Тааттаҕа «СӨ ОДьКХ» ГУТ филиалларын ХХ үбүлүөйдээх спартакиадата буолан ааста. Илин эҥэргэ сытар 6 филиалтан 300-кэ спортсмен мустан, 8 көрүҥҥэ күрэхтэстилэр. Таатталар барыта 26 мэтээли (16 кыһыл көмүс, 4 үрүҥ көмүс, 6 боруонса) хомуйан, урукку сыллардааҕы көрдөрүүнү быдан тупсарда. Көрүҥнэринэн хамаанданан кыайбыттарга анал Кубоктары, уопсай түмүккэ бастаабыкка көһөрүллэ сылдьар улахан Кубогы туттардылар.

Коммунальнайдар күрэхтэһиилэрэ Ытык Күөлгэ, Боробулга бардылар. Спартакиаданы «СӨ ОДьКХ» ГУТ генеральнай дириэктэрэ В.В.Омуков, бастакы солбуйааччыта М.М.Аргунова, тэрилтэ идэлээх сойууһун салайааччытаС.Е.Анисимов, «Таатта улууһа» МТ баһылыга М.М.Соров арыйдылар. Виктор Викторович бастыҥ үлэһиттэргэ наҕараадалары уонна спорт бэтэрээннэригэр бэлиэлэри туттарда.

Ытык Күөлгэ уонна Боробулга бильярдка күрэхтэстилэр. Спартакиада иккис күнүгэр спорт бары көрүҥнэригэр тэҥинэн барда. Остуол тенниһигэр Уус Алдан филиала бастаата. Таатта иккис, Чурапчы үһүс, Амма төрдүс буоллулар. Теннискэ биирдиилээн оонньууларга Таатта хамаандатын хапытаана Николай Новгородов уонна Александр Лазарев, Вилюяна Павлова бириистээх миэстэлэргэ таҕыстылар. Дьохсоҕон тииригэр салгын саатынан ытыыга Таатта филиала холкутук бастаата. «Олимпийскай» хочуолунай хачыгаара Геннадий Саввин, Уолба учаастагын хачыгаара Тимур Басов, тэрилтэ диспетчерэ Феина Татаринова чөмпүйүөн аатын сүктүлэр.

Ытык Күөлгэ мас тардыһыытыгар уонна хапсаҕайга хабыр киирсиилэр буоллулар. Күрэхтэһиигэ Кубоктар быраабылаларынан хамаандалар утарыта кииристилэр. Хапсаҕайга таатталар бастаатылар, мэҥэ хаҥаластар иккис, аммалар үһүс миэстэлэри ыллылар. Таатта филиалыттан Егор Попов — үһүс миэстэҕэ тигистэ, спорт маастардара Ариан Васильев, Исмаил Басов, Леонид Попов, бэтэрээннэргэ Василий Колесов бастааннар, хамаандаҕа кыайыыны аҕаллылар.

Мас тардыһыытыгар Таатта филиалын мадьынылара кэлбит ыалдьыттары сабарыйаннар, бастакы миэстэни хааччыннылар. Николай Сенькин, Модест Баишев, Иннокентий Попов, Иннокентий Макаров, Семен Хатылаев, Игнат Старостин кыайыы кынаттаннылар.

“Дуобат турнирыгар былырыын бастаабыт чурапчылары 3:2 ахсаанынан кыайан баран, аны мэҥэ хаҥаластарга хомолтолоохтук хоттороммут эмиэ иккис миэстэҕэ хааллыбыт. Урукку спартакиадаларга дуобакка элбэхтэ бастааммыт, олох тумус туттар көрүҥмүт этэ дьиҥинэн”, — диир Таатта филиалын үлэҕэ сэрэхтээх буолууга инженерэ Анатолий Мурунов. Дуобакка Анатолий Мурунов, Пантелеймон Сенькин, Семен Варламов, Митрофан Уваров, Дария Винокурова миэстэлэстилэр. Хамаанда чилиэннэрэ бары маастарга кандидаттар, өссө хас да спортсмен састаапка кыайан хапсыбата.

Волейболга үһүс миэстэни былдьаһыыга мэҥэ хаҥаластар уус алданнары кыайдылар. Таатта уонна Амма хамаандалара чөмпүйүөн аатын былдьастылар. Бастакы партияҕа Николай Степанов, Эрчим Пономарев, Егор Сабарайкин, Егор Грязнухин бэртээхэй кимиилэри көрдөрөннөр, кыайыыны ситистилэр. Иккис партияҕа аммалар тыыллан-хабыллан туран, бастыҥ кимээччилэрэ Емельянов күүстээх охсууларын блок да туппат түгэннэрэ буоллулар. Үһүс быһаарыылаах партияҕа тэрилтэ бэтэрээнэ Василий Тарасенко хапытааннаах Таатта филиалын хамаандата таба тактиканы тутуһан, кыайыы өрөгөйүн биллэ.

Саахымакка бүтэһик түһүмэххэ уус алданнар бастаан иһэр аммалары баһыйа тутаннар, спартакиада кыайыылаахтарынан буоллулар. Таатта филиала сыал-сорук туруорунан, саахымакка бириистээх үһүс миэстэҕэ таҕыста. «Балыыһа» хочуолунайын маастара Александр Лазарев үчүгэй оонньуулары көрдөрдө, кэрэ аҥардарга Александра Кириллина иннин кимиэхэ да биэрбэтэ. Хамаанда атын чилиэннэрэ Софрон Товаров, Владимир Колесов, тэрилтэ бэтэрээнэ Дмитрий Колесов орто көрдөрүүлэннилэр.

Бильярдка финалга Таатта, Томпо хамаандалара таҕыстылар. Прокопий Афанасьев (Ытык-Күөл), Владимир Кривошапкин (Чымынаайы), Николай Акимов (Дьохсоҕон), Дмитрий Гуляев, Гаврил Аянитов (Туора-Күөл) састааптаах хамаанда Томпо филиалын кыайан, спартакиада чөмпүйүөнүн аатын суктэ. Чурапчылар аммалары кытаанах киирсиигэ хотоннор, үһүс бириистээх миэстэни ыллылар.

Уопсай түмүккэ биэс көрүҥҥэ бастаабыт Таатта филиалын хамаандата (дириэктэр Д.Д.Павлов, профком В.И.Федосеева) ыалдьыттар хамаандаларын ырааҕынан куоһарда. Амма филиала (дириэктэр А.С.Нестерев, профком Н.М.Садовникова) иккис, Уус Алдан филиала (дириэктэр Е.И.Цой, профком Г.В.Васильев) үһүс миэстэ буолан үөрдүлэр. Мэҥэ Хаҥалас — төрдүс, Чурапчы — бэһис, Томпо — алтыс миэстэлэргэ таҕыстылар.

“ХХ Спартакиада үрдүк таһымнаахтык тэриллэн, туох да мөккүөрэ суох түмүктэннэ. Кэлбит ыалдьыттар, спортсменнар күрэхтэһии уопсай тэрээһинин улаханнык хайҕаан, махтанан бардылар. Бу барыта күһүҥҥэттэн үлэлээбит хамыыһыйа сыралаах үлэтин түмүгэ буолар. Тэрилтэ коллектива биир өйдөөх-санаалах үлэлээн, маннык улахан ситиһии кэлбитин бэлиэтиэххэ наада! Кэлэр ХХI Спартакиада Томпо улууһугар ыытыллыаҕа», — диэн кэпсээтэ Тааттатааҕы филиал инженерэ Анатолий Мурунов.

Ааптар: «Таатта» хаһыат, http://ulus.media/